ကျုံပျော်မြို့၌ ကိုဗစ်-၁၉ ကာကွယ်ရေး ငါးရိက္ခာများစားသုံးပေး အသိပညာပေး ပိုစတာများ စိုက်ထူ
ကျုံပျော် ဇွန် ၂၃
ကိုဗစ် -၁၉ ကာကွယ်ထိန်းချုပ်ရေးကာလတွင် ငါးစားသုံးခြင်းသည် ကျန်းမာရေးအတွက် အကျိုးရှိကြောင်း ပြည်သူများသိရှိစေရန်အတွက် "ကိုဗစ်-၁၉ ကာကွယ်ရေး ငါးရိက္ခာများ စားသုံးပေး" အသိပေးပိုစတာ စိုက်ထူခြင်းကို ဧရာဝတီတိုင်းဒေသကြီး၊ ကျုံပျော်မြို့နယ်၌ ယနေ့ နံနက်တွင် ဆောင်ရွက်ခဲ့ကြောင်း သိရသည်။
အဆိုပါ ဆိုင်းဘုတ်ကို မြို့နယ်ငါးလုပ်ငန်းဦးစီးဌာနမှ ဦးဆောင်၍ အများပြည်သူ တွေ့မြင်နိုင်စေရန် ဗိုလ်ချုပ်လမ်းမကြီးဘေးတွင် စုပေါင်းစိုက်ထူခဲ့ကြပြီး၊ မြို့မစျေးနှင့် လူစည်ကားရာနေရာများတွင် လက်ကမ်းစာစောင်များ ဖြန့်ဝေပေးခဲ့ကြသည်။
အသိပေးပိုစတာတွင် ငါးရိက္ခာသည် ငတ်မွတ်မှုနှင့် အာဟာရဓာတ်ချို့တဲ့မှု တိုက်ဖျက်ရေးအတွက် အရေးကြီးသောအခန်းကဏ္ဍမှ ပါဝင်လျက်ရှိပြီး ငါးအာဟာရဓာတ်သည် စားသုံးသူ ပြည်သူများအတွက် အာဟာရဓာတ်အပြင် ကျန်းမာစေသော အဆီဓာတ်၊ အိုမီဂါ - ၃ အဆီအက်စစ်၊ အိုင်အိုဒင်း၊ ဗစ်တာမင်ဒီနှင့် ကယ်လ်စီယမ်များကိုလည်း ဖြည့်တင်းပေးနိုင်ကြောင်း၊ အထူးသဖြင့် ကိုဗစ် - ၁၉ ကပ်ရောဂါ ကာကွယ်ထိန်းချုပ်ရေးကာလတွင် ပြည်သူတို့သည် မိမိတို့အိမ်အတွင်း နေထိုင်ကြရသဖြင့် စားသုံးသောအစားအစာများမှ အာဟာရဓာတ်မျှတစွာရရှိရေး ဂရုပြုစားသောက်ကြရမည်ဖြစ်ပြီး၊ ငါးစားသုံးပေးခြင်းဖြင့်လည်း ငါးတွင်ပါဝင်သောဗစ်တာမင်- ဒီ မှ ရောဂါပိုးများ ခုခံကာကွယ်ရေးနှင့် ကိုယ်ခံအားအတွက် အထောက်အပံ့ဖြစ်စေကြောင်း၊ ငါးငယ်လေးများတွင်ပါဝင်သော အာဟာရဓာတ်များသည် အစားထိုးမရနိုင်သော အာဟာရတန်ဖိုးများဖြစ်ကြောင်း၊ ငါးသည်ဈေးနှုန်းသင့်တင့်စွာဖြင့် အများပြည်သူ ဝယ်ယူစားသုံးနိုင်သည့် အာဟာရဓာတ်တစ်မျိုးဖြစ်ကြောင်းနှင့် ငါးစားသုံးခြင်း ဖြင့် ရရှိသောအကျိုးကျေးဇူးများအပြင် ငါးပုဇွန်နှင့် ပင်လယ်စာများတွင် အဓိကပါဝင်သော အာဟာရဓာတ်များကို ဖော်ပြပေးထားကြောင်း သိရသည်။
နေဝင်းမြင့် (ပြန်/ဆက်)
0 Comments