ကျုံပျော်တွင် ကိုဗစ်-၁၉ ကြောင့် ရပ်နားထားသော ကာကွယ်ဆေးများ ပြန်လည်စတင် ထိုးနှံ
ကျုံပျော် မေ ၁၈
ဧရာဝတီတိုင်းဒေသကြီး၊ ကျုံပျော်မြို့နယ်တွင် ကိုဗစ်-၁၉ ကြောင့်ရပ်နားထားရသော ကာကွယ်ဆေးများကို ဆေးရုံအခြေပြု တိုးချဲ့ကာကွယ်ဆေးထိုးစီမံချက်ဖြင့် မေ ၁၈ ရက်က မြို့နယ်ပြည်သူ့ဆေးရုံ၌ ပြန်လည်စတင် ထိုးနှံခဲ့ကြောင်း သိရသည်။
ယနေ့တွင် တေဇနှင့် မြဝတီရပ်ကွက်တို့မှ ကလေးငယ် (၅၀)ဦးအား ကာကွယ်ဆေးစတင်ထိုးနှံခြင်းကို ဆောင်ရွက်ပြီး၊ ကိုဗစ်-၁၉ ကာကွယ်ရေးနည်းလမ်းများနှင့်အညီ လူချဲ့၍ သတ်မှတ်နေရာများ ဆောင်ရွက်ခြင်း၊ နှာခေါင်းစည်းနှင့် Faceshield တပ်ဆင်ခြင်းများကိုပါ စနစ်တကျ စီစဉ်ဆောင်ရွက်ပေးကြောင်း သိရသည်။
အဆိုပါ ကာကွယ်ဆေးထိုးလုပ်ငန်းသို့ တိုင်းဒေသကြီးလွှတ်တော်ကိုယ်စားလှယ် မန်ဂျော်နီနှင့် ဌာနဆိုင်ရာ အကြီးအကဲများ၊ လူမှုရေးအဖွဲ့များ၊ တာဝန်ရှိသူများတက်ရောက်အားပေးခဲ့ကြကြောင်း သိရသည်။
အဆိုပါလုပ်ငန်းကို ၁ ပါတ်လျှင် (၅)ရက် ဆောင်ရွက်သွားမည်ဖြစ်ပြီး၊ လူစုလူဝေးမဖြစ်ပေါ်စေရန်စနစ် တကျ စီစဉ်ဆောင်ရွက်သွားမည်ဖြစ်ကြောင်း၊ ယခုမြို့ပေါ်ရပ်ကွက်များရှိကလေးငယ်များကို ကာကွယ်ဆေး ထိုးနှံခြင်းဖြစ်ပြီး၊ ဇွန် ၁ ရက်နေ့မှစတင်၍ ကျေးရွာရှိ ကလေးငယ်များကို ထိုးနှံဆောင်ရွက်ပေးသွားရန် ညွှန်ကြားထားကြောင်း မြို့နယ်သူနာပြုအဆင့် (၁) ဒေါ်ထူးရည်ရွှေ ထံမှသိရသည်။
နေဝင်းမြင့်(ပြန်/ဆက်)
0 Comments